Hon Lt. (Rtd) Chawngthansanga
(5.8.1923 – 24.8.2009)
(Vui ni a a chanchin semchhuah)
Pian leh murna: Pu Chawngthansanga hi Upa Zakhuma leh Pi Saplutthangi te fa pangana ni turin Durtlang Mel-8 (Selesih) ah ni 5.8.1923 khan a lo piang a. A pa Upa Zakhuma (L) hi durtlang Mel 8 Kohhran a Upa hmasa ber a ni. A nu Saplutthangi hi Durtlang Lal M.Suaka farnu Chawngchingi fanu neihchhun a ni bawk. Unau pianpui pakua a nei a, an upat dan indawt chu hetiang hi a ni:
- Lahnuailiana (Patea) (L) h/o Rothangpuii, Durtlang North
- Duhchhungi (L)
- Upa Vanlallawma (L) h/o Zathluaii (L), Durtlang Mel 5
- Vanlaltlana h/o Chawngzikpuii, Leitan
- Chawngthansanga h/o Lalhliri (L)
- Chawngliani (L) w/o Thanseia (L), Durtlang
- Lalbiakliana (L)
- Chawngthuami (L)
- Lalhmingliani w/o Vanlalliana (L), Durtlang M 5
- Seizika (L) h/o Rinthangi, Durtlang M 5
Eizawnna leh zirna lam: Pu Chawngthansanga hi lehkhathiam thei leh zirna ngaihlu em em tu a ni a. An hun laia an hriat san pawl, pawl 6 pass ve ngei tumin Durtlang Mel-8 atangin Aizawl ah inhlawhfa chawpin Sikul Sen ah Pawl 3 kum 1938 khan a zir a. 1st Term ah pakhatna niin, beiseina sang tak nena a awm lai in, an Sikul hnathawhna hmunah mau in a ke a chhun avangin a che thei ta lova, Sikul Sen-ah pawh zirzawm thei lo in Durtlang lamah a zir chhunzawm a, pawl 3 ah hian Zoram pumah pangana ani ve nghe nghe a ni.
Indopui II-na alo chhuah khan, ni 17.2.1944 khan Lushai Scout an tih mai, Biate Sipai an tih bawk (98 Infantry Company) a zawm a. Burma ah kalin, “A hmingin in kahna ah vawithum chu ka tel” a ti. Lushai Scout disband a nih hnu ah 3 Assam Regiment ah a lut zui a. Hemi atang hian 5 Assam Regiment ah a kal leh a. Hemi a a awmlai hian China in India a run a, India sipai tamtak chin hriat loh in an awm a, sipai bo zawng tur hian Jamedar ah promotion pe in China ramri lamah tirh a ni. Sipai ah hian Subedar a thleng a, Honorary Lieutenant in ni 16 February 1972 khan a pension veta a ni.
Chhungkaw lam: Ni 29 October 1949 khan Lahliri d/o Thangkhuma, Durtlang Mel-8 nen an innei a, fa panga, mipa pakhat leh hmeichhia pali an nei, Tu paruk leh tuchhuan pathum an nei a, Pi Lalhliri hian November ni 27, 2007 khan alo boral san tawh a. An fate zawng zawng hian Pathian malsawmna dawngin Sorkar hna an chelh kim a ni.
An fate leh an kawppui te (Upat dan indawtin):
- Zoramthangi w/o K. Malsawma, Kana Veng
- Zohmingliana h/o F.Lalbiakdiki
- Dr. Zothanzuali w/o C.Lalengkima, Electric Hebron
- Zosangzuali
- Zodinmawii (L)
Kohhran leh Khawtlang rawngbawlna lam: A phak ang chin chinah chuan kohhran leh khawtlang rawngbawlna ngaipawimawh mi a ni a. Puitling Sunday School zirtirtu, Pulpit rawngbawlna leh hnamdang zinga rawngbawlna ah te inhmangin, a thihni thlengin hnamdang rawngbawlna (Masihi Shangati) ah zirtirtu a ni. Kum 1988 – 1989 khan Mobile Theological School atangin Pathian thu a zir chhuak bawk. Lawmman danglam tak, Sunday School Exam taimak man chu ni 3.8.1985 MSSU Golden Jubilee Ni tak khan a dawng bawk. Bible Society rawngbawlna ngai pawimawh em em tu a ni bawk.
Tin, khawtlang rawngbawlna lam veimi a ni a, tuna an chenna ah hian 1972 ah an awm tan a, Electric Hebron veng hming pawh hi ama phuah a ni nghe nghe. Zoram Upa Pawl leh Ex-Service lamah te a inhmang ve thin. Ex-Service League, Delhi leh Aizawl ah Life Member niin nikum lam thleng khan hruaitu zingah ala tel ve thin a, kumin (2009) ah erawh ama chak tawk loh na avangin a telpui peih ta lo a ni.
A hun hnuhnung: Ama tawka mi inthunun thei tak leh mi hrisel tha tak a ni ve thin a. Kum li kum nga vel kal ta atang khan kum upat kaihhnawih, lung lam that lohna leh insawiselna neuh neuh a nei tan a. Tunkar hnih kal ta vel atang khan insawiselna nei thar leh in pumna leh khawsik in a tlakbuak a, ni 22.8.2009 (Inrinni) khan Greenwood Hospital-ah dah luh a ni a, Investigation pawh ti mumal hman lo leh nat buai em em leh hrehawm tak tuar lovin ni 24.8.2009 zing dar 4:30 khan a rawng a bawl sak thin Lalpa hnenah a lo chawl ta a ni.
A vuina inkhawm ah hian a hla duh “Pathianin Misual a hmangaih” (KHB NO 41) tih chu sak a ni. |
